விஜய் தொலைக்காட்சியில், காமெடியை அடிப்படையாக கொண்டு ஒளிபரப்பாகி வரும் சமையல் நிகழ்ச்சி 'குக் வித் கோமாளி'. கடந்த 3 சீசன்களும் மெகா ஹிட் கொடுத்த நிலையில் கடந்த ஜனவரி 28-ம் தேதி முதல் 4-வது சீசன் தொடங்கியுள்ளது. இந்த நிகழ்ச்சிக்கு நடுவர்களாக செஃப் தாமு மற்றும் செஃப் வெங்கடேஷ் பட் உள்ளனர். நிகழ்ச்சி தொகுப்பாளராக ரக்ஷன் தொடர்கிறார்.
இந்த நிகழ்ச்சியில் கலந்து கொள்ளும் குக் முதல் கோமாளிகள் வரை பெரும்பாலானோர் அடுத்தடுத்து வெள்ளித்திரை வாய்ப்பை கைப்பற்றி வருவதாலும், பாசிட்டிவ் விமர்சனங்கள் கிடைத்து வருவதாலும், பிக்பாஸ் நிகழ்ச்சி வேண்டாம் என நினைப்பவர்கள் கூட, இந்த நிகழ்ச்சியில் கலந்து கொள்ள ஆர்வம் காட்டி வருகின்றனர்.
'குக் வித் கோமாளி சீசன் 4' நிகழ்ச்சியில் இந்த முறை 10 போட்டியாளர்கள் கலந்து கொண்டுள்ளனர். குறிப்பாக கடந்த 3 சீசனில் கோமாளியாக இருந்த ஷிவாங்கி இந்த முறை குக்காக மாறியுள்ளார். இவருடன் நடிகை சிருஷ்டி டாங்கே, பிக் பாஸ் பிரபலமான நடிகை ஷெரின், நடிகை விசித்ரா, அஜித் பட நடிகர் ராஜா ஐயப்பா, பாக்கியலட்சுமி சீரியல் தொடர் ஹீரோ விஜே விஷால், காளையன், மைம் கோபி, கிஷோர், ஆண்ட்ரியா என பத்து போட்டியாளர்கள் கலந்துகொண்டனர்.
பழம்பெரும் நடிகரும் நாகேஷின் பேரனும் நடிகர் ஆனந்த் பாபுவின் மகனுமான கஜேஷ், கலை இயக்குநரும் நடிகருமான கிரண் ஆகியோர் வையில்கார்ட் எண்ட்ரி கொடுத்தனர்.
கோமாளிகளாக முந்தைய சீசன்களில் இருந்த புகழ், குரேசி, சுனிதா, தங்கதுரை ஆகியோர் உடன் புதிய கோமாளிகளாக ஜி.பி.முத்து, சிங்கப்பூர் தீபன், ரவீனா, மோனிஷா, சில்மிஷ சிவா, ஓட்டேரி சிவா உள்ளிட்டோர் கலந்து கொண்டுள்ளனர்.
இந்தப் போட்டியில் முதல் ஃபைனலிஸ்டாக விசித்திரா தேர்வான நிலையில், இந்த நிகழ்ச்சியின் அரை இறுதிச்சுற்று இந்த வாரம் நடைபெற்றது. இந்தப் போட்டியில் இருந்து மூன்று நபர்களை இறுதி சுற்றுக்குத் தேர்ந்தெடுக்கப்போவதாக நடுவர்கள் அறிவித்தனர்.
அதன்படி, இறுதி சுற்றின் இரண்டாவது போட்டியாளராக மைம் கோபி, மூன்றாவது போட்டியாளராக சிவாங்கி தேர்ந்தெடுக்கப்பட்டார். நான்காவது போட்டியாளராக சிருஷ்டியும் தேர்ந்தெடுக்கப்பட்டார். இந்த நிலையில் கிரண் வெளியேற்றப்படுவார் என்று அனைவரும் எதிர்பார்த்து காத்திருந்த நிலையில் கிரண் ஐந்தாவது போட்டியாளராக தேர்ந்தெடுக்கப்படுவதாக நடுவர்கள் அறிவித்தனர்.
குக் வித் கோமாளி நிகழ்ச்சியில் தொடங்கத்தில் இருந்து ஆர்வமுடன் கலந்து கொண்ட ஸ்ருஷ்டி தனது இன்ஸ்டாகிராம் பக்கத்தில் உருக்கமான பதிவு ஒன்றை வெளியிட்டுள்ளார். அதில், தேங்க்யூ மோனி மற்றும் தங்கத்துரை உங்கள் இரண்டு பேரையும் நான் மிகவும் காதலிக்கிறேன். நான் வென்ற போது மிகவும் ஆசிர்வதிக்கப்பட்டது போல் உணர்ந்தேன். இவை எல்லாத்திற்கும் காரணம் மோனி மற்றும் தங்கதுரைதான் என உருக்கமாக பதிவிட்டுள்ளார்.
